Trajneri i Shqipëria U-21, Alban Bushi, ka bërë të ditur se në muajin mars priten prurje të reja në skuadër, ndërsa disa prej tyre mund t’i bashkohen shpejt edhe ekipit të parë të drejtuar nga Sylvinho.
I ftuar në emisionin Sport News në News 24, Bushi u shpreh se aktualisht janë dy lojtarë që pritet të afrohen me siguri, ndërsa për dy të tjerë bisedimet janë ende në vijim.
Ai theksoi se bëhet fjalë për futbollistë me potencial të madh, të cilët sipas tij mund të jenë shumë shpejt pjesë edhe e Kombëtarja shqiptare.
Sa i përket profileve, Bushi bëri të ditur se mes emrave të përfolur janë një mbrojtës i djathtë, një mesfushor i qendrës dhe dy sulmues, ndërsa në vëzhgim është edhe një mbrojtës shumë i ri, i lindur në vitin 2009, që aktivizohet me ekipin e parë në kampionatin ku luan.