Kuvendi i Kosovës është konstituuar të mërkurën me zgjedhjen e Albulena Haxhiut në krye të institucionit. Ajo mori 66 vota pro, 44 kundër dhe 8 deputetë abstenuan, duke u bërë kryetarja e re e Kuvendit në legjislaturën e dhjetë.
Pas zgjedhjes së saj, në pako u votuan edhe pesë nënkryetarët: Ardian Gola (LVV), Vlora Çitaku (PDK), Kujtim Shala (LDK), Emilja Rexhepi (nga komunitetet) dhe Sllavko Simiq (Lista Serbe). Ata morën 104 vota pro, tre kundër dhe gjashtë abstenuan. Çështja e përfaqësimit të komunitetit serb në kryesi kishte shkaktuar bllokada vitin e kaluar, ndërsa së fundmi Gjykata Kushtetuese i dha të drejtë Listës Serbe për propozimin e kandidatit.
Në fjalimin e saj të parë si kryeparlamentare, Haxhiu u zotua për punë me përgjegjësi, transparencë dhe respekt për të gjithë deputetët, duke theksuar se Kuvendi duhet të funksionojë me dinjitet dhe në përputhje me Kushtetutën. Ajo deklaroi se detyrën do ta ushtrojë me paanshmëri dhe integritet të plotë institucional.
Haxhiu foli edhe për procesin gjyqësor në Hagë ndaj ish-krerëve të UÇK-së, duke theksuar se lufta çlirimtare ka qenë e drejtë dhe se pret që ata të kthehen sa më parë në Kosovë.
Para zgjedhjes së kryeparlamentares, u verifikuan mandatet dhe u betuan 118 deputetët e rinj të Kuvendit. Seanca konstituive u udhëhoq nga deputeti më i moshuar, Avni Dehari, i asistuar nga deputetja më e re, Fatma Taçi.
Presidentja Vjosa Osmani dhe presidenti i Shqipërisë, Bajram Begaj, uruan Haxhiun për zgjedhjen, duke theksuar rëndësinë e bashkëpunimit institucional dhe mbështetjen për rrugën euroatlantike të Kosovës.
Gjatë ditës pati edhe zhvillime të tjera politike. PDK-ja paralajmëroi se do të kërkojë miratimin e një rezolute për procesin në Gjykatën Speciale, ndërsa deputetë të ndryshëm shprehën qëndrimet e tyre lidhur me formimin e qeverisë së re. Kryeministri në detyrë, Albin Kurti, tha se synimi është konstituimi i suksesshëm i Kuvendit dhe më pas formimi i qeverisë.
Albulena Haxhiu, e lindur në Prishtinë më 11 maj 1987, ka qenë ministre e Drejtësisë në dy mandate dhe në zgjedhjet e fundit ishte gruaja më e votuar për deputete, me mbi 174 mijë vota.