Kreu i Lëvizjes Bashkë, Arlind Qori, ka reaguar me një qëndrim të fortë kundër kryeministrit Edi Rama, duke e akuzuar se po ndjek të njëjtën logjikë sulmesh ndaj drejtësisë si ish-kryeministri italian Silvio Berlusconi.
Në statusin e tij, Qori kujtoi se Berlusconi mbijetoi politikisht për vite duke ngritur një “valë shpifjesh” kundër prokurorëve dhe gjykatësve italianë, të cilët i etiketonte si komunistë. Sipas tij, e njëjta strategji po përdoret sot nga Rama, i cili flet për një “Republikë të Prokurorëve” dhe për një të ashtuquajtur “grusht shteti” të drejtësisë ndaj pushtetit.
Qori ironizon retorikën e Ramës, duke vënë në dukje se “grusht shteti pa forca të armatosura” është absurd në vetvete, ndërsa shton se kryeministri nuk arrin të bindë askënd se kush është “dora e fshehtë” pas SPAK-ut dhe sistemit të drejtësisë. “Komunistët? Jo, alienët,” shkruan ai me sarkazëm, duke theksuar se të gjitha alibitë e Ramës bien ndesh me vetë deklaratat e tij për marrëdhëniet e ngushta me partnerët perëndimorë.
Sipas Qorit, disa prokurorë dhe gjykatës “thjesht po bëjnë detyrën e tyre”, edhe pse me vonesa dhe ende jo plotësisht. Ai thekson se në një vend ku shumica e institucioneve i tradhtojnë qytetarët, drejtësia meriton respekt për hapat e para që po ndërmerr.
Në përfundim, Arlind Qori i bën thirrje kryeministrit Rama të tërhiqet: “Nëse i ka mbetur një fije dinjiteti, duhet të mos bëhet më qesharak dhe të japë dorëheqjen. Sot, se nesër është vonë.”