Shtetet e Bashkuara dhe Irani, së bashku me një grup ndërmjetësuesish rajonalë, po diskutojnë mundësinë e një armëpushimi të përkohshëm 45-ditor, që mund të hapë rrugën për një marrëveshje më të qëndrueshme për përfundimin e konfliktit.
Sipas raportimit të “Axios”, bisedimet po zhvillohen me ndërmjetësimin e disa vendeve të rajonit dhe synojnë krijimin e një pauze të përkohshme në luftime, e cila mund të shërbejë si bazë për negociata më të gjera diplomatike.
Diskutimet po zhvillohen përmes Pakistanit, Egjiptit dhe Turqisë, ndërsa përfshijnë edhe komunikime direkte mes të dërguarit special të Donald Trump, Steve Witkoff, dhe ministrit të Jashtëm iranian, Abbas Araghchi.
Megjithatë, burime amerikane, izraelite dhe rajonale të cituara nga “Axios” vlerësojnë se shanset për arritjen e një marrëveshjeje, qoftë edhe të pjesshme, brenda 48 orëve të ardhshme mbeten të vogla.
Zyrtarët iranianë kanë shprehur shqetësim se një armëpushim i përkohshëm mund të përsërisë skenarë të ngjashëm me ata në Rripin e Gazës dhe Liban, ku marrëveshjet ekzistojnë formalisht, por përshkallëzimet vazhdojnë.
Ndërkohë, “Reuters” thekson se informacionet mbi këto bisedime nuk janë konfirmuar ende nga burime të pavarura. Përpjekjet diplomatike vijnë në një moment tensionesh të larta në Lindjen e Mesme, ku operacionet ushtarake dhe kërcënimet nga të dyja palët po rrisin rrezikun e një konflikti më të gjerë rajonal.