Mandati i dytë i Presidentit të SHBA-së, Donald Trumpit, po formësohet nga ambiciet e tij në politikën e jashtme. Trumpi i ka përmbushur kërcënimet kundër Venezuelës, duke kapur presidentin e saj dhe gruan e tij nga kompleksi i tyre i fortifikuar rëndë në Karakasin, në një bastisje dramatike gjatë natës.
Sipas BBC-së, kur përshkroi operacionin, Trumpi hodhi poshtë Doktrinën e Monrosë të vitit 1823 dhe premtimin e saj për supremacinë e SHBA-së në hemisferën perëndimore, duke e riemëruar atë si “Doktrina Donroe”. Ja disa nga paralajmërimet që Trumpi ka bërë kundër kombeve të tjera ditët e fundit.
Groenlanda
SHBA-të tashmë kanë një bazë ushtarake në Groenlandë – Bazën Hapësinore të Pituffikut – por Trumpi dëshiron të gjithë ishullin. “Ne kemi nevojë për Groenlandën nga pikëpamja e sigurisë kombëtare”, u tha Trumpi gazetarëve, duke shtuar se rajoni ishte i mbushur me anije ruse dhe kineze.
Ishulli arktik, pjesë e Mbretërisë së Danimarkës, është i pasur me minerale të rralla të tokës, thelbësore për prodhimin e teknologjisë dhe pajisjeve ushtarake. Ai zë gjithashtu një pozicion strategjik në Atlantikun e Veriut dhe në Rrethin Arktik, i cili po fiton rëndësi ndërsa akujt polarë shkrihen dhe hapen rrugë të reja detare.
Kryeministri i Groenlandës, Jens Frederik Nielseni, e quajti idenë e kontrollit amerikan mbi ishullin një “fantazi” dhe theksoi se çdo dialog duhet të bëhet me respekt për të drejtën ndërkombëtare. Një veprim ushtarak amerikan do ta sillte SHBA-në në konflikt me një vend tjetër të NATO-s.
Kolumbia
Vetëm disa orë pas operacionit në Venezuelë, Trumpi paralajmëroi presidentin e Kolumbisë, Gustavo Petron, që të “kishte kujdes”. Kolumbia është e pasur me naftë dhe minerale dhe është një qendër kyçe e trafikut të drogës, veçanërisht të kokainës.
Trumpi ka akuzuar qeverinë e Kolumbisë se po lejon kartelet të lulëzojnë dhe ka vendosur sanksione ndaj presidentit Petros. Duke folur në Air Force One-in, Trumpi tha se Kolumbia po drejtohej nga “një njeri që i pëlqen të prodhojë dhe shesë kokainë”, duke shtuar se një operacion amerikan “i duket mirë”.
Irani
Irani po përballet me protesta masive antiqeveritare dhe Trumpi paralajmëroi se autoritetet e Iranit do të “goditeshin shumë rëndë” nëse vdisnin më shumë protestues. Ai tha se SHBA-të po e ndjekin situatën në Iran nga afër.
Trumpi e ka kërcënuar më parë Iranin me veprime të tjera ushtarake, pas sulmeve ndaj objekteve të tij bërthamore vitin e kaluar, të lidhura me konfliktin 12-ditor Izrael–Iran. Mediat amerikane raportojnë se mundësia e sulmeve të reja në vitin 2026 është diskutuar edhe në takime të fundit në Mar-a-Lagon.
Meksika
Trumpi është rikthyer te retorika e fortë ndaj Meksikës, duke e akuzuar qeverinë e Meksikës për mosndalimin e fluksit të drogës dhe emigrantëve të paligjshëm drejt SHBA-së. Ai ka deklaruar se kartelet meksikane janë “shumë të forta” dhe se “do të duhet të bëhet diçka”.
Trumpi ka ofruar dërgimin e trupave amerikane në Meksikë për të luftuar kartelet, por presidentja e Meksikës, Claudia Sheinbaum, e ka refuzuar publikisht çdo ndërhyrje ushtarake amerikane.
Kuba
Kuba, vetëm 145 kilometra nga Florida, ka qenë nën sanksione amerikane për dekada dhe ka pasur marrëdhënie të ngushta me Venezuelën e Nicolás Maduros, veçanërisht në furnizimin me naftë.
Trumpi sugjeroi se ndërhyrja ushtarake në Kubë nuk është e nevojshme, duke thënë se vendi është pranë kolapsit ekonomik pas largimit të Maduros. Sekretari i Shtetit, Marco Rubioja, ka paralajmëruar se autoritetet e Kubës duhet t’i marrin seriozisht deklaratat e presidentit amerikan.