Kryetari i Partisë Demokratike, Sali Berisha, ka publikuar pjesë nga dosja hetimore e zëvendës-kryeministres Belinda Balluku, ku ajo shfaq shqetësime mbi menaxhimin e kontratave të supervizionit të Unazës së Madhe. Në bisedat e saj me Evis Berberin përmendet edhe kryeministri Edi Rama dhe ndikimi i tij në vendimmarrje.
Diskutimet përqendrohen tek hapja e kontratave të supervizionit, afatet trevjeçare dhe ndikimi financiar i vendimeve për proceset e reja. Nga komunikimet rezulton shqetësim për disa kontrata të hapura për mirëmbajtje dhe pakënaqësi për mungesën e informacionit mbi veprimet e ndërmarra.
Balluku i shkruan Berberit: “Për këtë flet ky se ka rënë dakord me Ramën! Pse ia ke bërë për tre vite? Merru me këto se do më çmendësh”. Ajo gjithashtu i dërgon Berberit fotografi të kontratave të supervizionit për mirëmbajtjen e akseve rrugore në rajonet Jugore, Qendrore dhe Verilindore, duke përfshirë lotet 1 deri 4 sipas VKM-së nr. 600, datë 13.10.2021.
Në një tjetër mesazh, Balluku shton: “Ca janë këto supervizione që paske hapur ti? Një do ta marrë ky super k… ia ka premtuar R.” Këto mesazhe tregojnë qartë shqetësimet e Ballukut për mënyrën se si po menaxhohen proceset dhe përfshirjen e Ramës në vendimmarrje.
Përveç këtyre, komunikimet tregojnë se Evis Berberi ka koordinuar veprimet edhe me Rais Petrelën për çështje të lidhura me prokurimet dhe supervizionet e rrugëve. Publikimi i këtyre përgjimeve nënvizon tensionet brenda qeverisë dhe shqetësimet për transparencën në menaxhimin e kontratave strategjike.