Sipas gazetës gjermane Bild, sulmuesi i Hoffenheimit, Fisnik Asllani, është shndërruar në një nga objektivat kryesorë të Borussia Dortmundit për merkaton verore. Futbollisti i ri me origjinë shqiptare ka shkëlqyer me paraqitjet e tij në Bundesligë, duke tërhequr vëmendjen e një sërë klubesh të mëdha, ndërsa Dortmundi për momwntin shihet si skuadra më e interesuar për të siguruar shërbimet e tij.
Drejtuesit verdhezi e shohin Asllanin si një investim të rëndësishëm afatgjatë, falë potencialit të tij dhe moshës së re. Shpejtësia, teknika, inteligjenca në lojë dhe aftësia për të gjetur rrugën e rrjetës e bëjnë atë një profil të përshtatshëm për stilin e lojës që Dortmundi synon të zhvillojë në sezonet e ardhshme.
Interesi i klubit gjerman vjen në një periudhë ku Asllani po konsolidon gjithnjë e më shumë rolin e tij te Hoffenheimi, duke u konsideruar si një nga talentet më premtues të Bundesligës. Nëse bisedimet ecin përpara, ky mund të jetë një nga transferimet më të rëndësishme të verës në futbollin gjerman.