Partia CDU/CSU, e udhëhequr nga Friedrich Merz, ka dalë fituese në zgjedhjet e mbajtura këtë të diel (23 shkurt), duke arritur rreth 29% të votave. Pas shpalljes së rezultateve, Merz e bëri të qartë se nuk ka kohë për të humbur dhe se prioriteti i tij kryesor është formimi i një qeverie të re sa më shpejt të jetë e mundur.
Në deklaratat e tij të para pas fitores, Merz theksoi ndjeshmërinë e madhe që ndjen ndaj përgjegjësisë që mban mbi shpatulla. Ai pranoi se fushata elektorale ka qenë jashtëzakonisht e ashpër, duke u përqendruar në çështje të ndjeshme si ekonomia, migracioni, politika e jashtme dhe siguria. Pavarësisht sfidave, Merz shprehu besimin se do të arrijë të krijojë një qeveri të aftë për të vepruar dhe për të përballuar sfidat e mëdha që presin Gjermaninë.
Ai deklaroi se qeveria e re do të synojë të përmbushë interesat e qytetarëve gjermanë dhe të marrë vendime të mençura dhe të shpejta për të përmirësuar situatën e brendshme dhe ndërkombëtare të vendit. “Bota jashtë nuk na pret dhe negociatat e gjata nuk janë një opsion. Ne duhet të veprojmë shpejt dhe me vendosmëri”, u shpreh Merz, duke theksuar urgjencën e krijimit të një kabineti të fortë që do të mund të përballojë sfidat që ka përpara Gjermania.
Ndërkohë, sekretari i përgjithshëm i SPD-së, Matthias Miersch, komentoi rezultatet duke e cilësuar humbjen e partisë si “historike” dhe këtë mbrëmje si një nga më të hidhurat për socialdemokratët. Ai pranoi se koalicioni i udhëhequr nga SPD-ja ka dështuar dhe është rrëzuar nga votuesit.
Në lidhje me mundësinë që SPD-ja të jetë pjesë e qeverisë së ardhshme, Miersch tha se fjala e fundit do t’i takojë anëtarëve të partisë, duke lënë të hapur mundësinë e një vendimi brenda-partiak për hapat e ardhshëm.
Me këtë rezultat zgjedhor, CDU/CSU po përgatitet për negociata të shpejta dhe intensive për formimin e një qeverie të re që synon të stabilizojë dhe të drejtojë vendin në një periudhë sfiduese për Gjermaninë dhe Evropën.