Kreu i KQZ-së tha para mediave se nga datat 7 deri më 19 prill pritet të përmbyllet procesi i përgatitjes së zarfeve zgjedhore për votuesit nga mërgata, të regjistruar për zgjedhjet e 11 majit.
Dërgimi i tyre pritet të nisë më 17 prill.
Ilirjan Celibashi theksoi se fletët e votimit po prodhohen në Slloveni, ndërsa sqaroi se votuesit nga mërgata do ta tërheqin personalisht zarfin me fletën e votimit me anë të mjetit identifikues. Sipas tij, askush tjetër nuk mund të tërheqë zarfin, pasi shërbimi postar do ta dorëzojë atë vetëm te aplikuesit përkatës.
“Ka filluar procesi i printimit të fletëve të votimit për votimin jashtë vendit dhe besojmë që midis datave 7-8 prill do të kemi këtu fletët e votimit. Midis 8-9-10 prillit fillojmë përgatitjen e zarfave dhe dokumentacionit që do t’u dërgohet votuesve, duke shpresuar që ky proces të realizohet brenda datës 15-17 prill. Kjo është një kohë e mjaftueshme, sipas parashikimeve kontraktuale që kemi me operatorin e shërbimit postar, për të dërguar zarfat, për t’u dhënë votuesve rreth 3-4 ditë kohë për të plotësuar fletën e votimit dhe për t’i kthyer ato në KQZ deri në orën 19:00 të datës 11 maj.
Jemi duke përfunduar një tutorial për gjithë sa duhet të bëjë votuesi nga jashtë dhe brenda 2-3 ditëve do ta bëjmë publik nëpërmjet mediave dhe rrjeteve sociale. Po ndërtojmë një sistem të ndihmës dhe këshillimit për votuesit nga jashtë, nëse kanë nevojë për sqarime mbi procedurat e votimit. Në setin e dokumentacionit që do t’u dërgojmë do të jetë edhe një udhëzues që sqaron qartë se çfarë duhet të bëjë votuesi nga jashtë”** – tha Celibashi.