Ish-ambasadori amerikan në Beograd, Christopher Hill, ka dëshmuar në Gjykatën Speciale në Hagë në lidhje me kontaktet e para të diplomacisë amerikane me Ushtrinë Çlirimtare të Kosovës gjatë viteve 1997–1998. Hill tha se përfshirja fillestare u bë nga diplomati amerikan Robert Gelbard.
“Ambasadori Gelbard kishte pasur disa takime me shqiptarë në Zvicër që pretendonin se përfaqësonin UÇK-në, por nuk kishte asnjë provë se ata ishin realisht përfaqësues të saj,” deklaroi Hill para trupit gjykues.
Ai shtoi se në fillimet e saj, UÇK-ja nuk kishte një strukturë të qartë drejtuese që mund të identifikohej lehtësisht nga diplomacia ndërkombëtare.
“Ishte e vështirë të gjeje dikë që mund të fliste me autoritet në emër të organizatës,” tha ish-ambasadori.
Hill konfirmoi se Gelbard, në atë periudhë, e kishte cilësuar UÇK-në si “organizatë terroriste”, duke u bazuar në përvojat e tij të mëparshme diplomatike në Amerikën Latine. Komentet e tij në atë kohë u kritikuan gjerësisht nga aktorë politikë dhe analistë, të cilët argumentuan se deklarata të tilla mund të kenë inkurajuar vijimin e operacioneve të dhunshme nga forcat serbe kundër shqiptarëve të Kosovës.
Hill theksoi kontekstin diplomatik të kohës dhe përpjekjet për të shmangur përshkallëzimin e konfliktit.
Dëshmia e tij është pjesë e procesit gjyqësor ndaj ish-figurave të larta politike dhe ushtarake të UÇK-së, të akuzuar për krime lufte dhe krime kundër njerëzimit.