Prokuroria e Posaçme Antikorrupsion (SPAK) ka zbardhur detaje nga dosja e Agjencisë Kombëtare të Shoqërisë së Informacionit (AKSHI), ku rezultojnë të përfshirë si pjesë e një grupi të strukturuar kriminal drejtoresha e Përgjithshme, Mirlinda Karçanaj, zv.drejtoresha Hava Delibashi, biznesmenët Ergys Agasi dhe Ermal Begiri, si dhe zv.drejtori i Policisë së Tiranës, Erjon Ismaili.
Në argumentet e SPAK-theksohet se Karçanaj kishte njohje të drejtpërdrejta me Ermal Begirin, i cili është ortak i shoqërive tregtare që marrin pjesë në tenderat e AKSHI-t. Takimet e drejtoreshës së AKSHI-t janë konfirmuar përmes kamerave të instaluara në zyrën e Ergys Agasit.
Pamjet filmike të regjistruara në pajisjen “4-Smart Battery Camera” tregojnë se personat e përfshirë diskutonin edhe vlerat e kontratave publike dhe manipulimin e tyre. Në një prej bisedave përmenden shifra konkrete:
“Projekti bën 2 milion, ne do ta bëjmë 4” ose “nuk futet as në eksperiencë”.
Këto komente, sipas SPAK, nënkuptojnë përcaktimin e kritereve të procedurave të prokurimit, fondin limit të kontratave dhe mënyrën e përfitimit të paligjshëm nga operatorët e lidhur me zyrtarët e AKSHI-t.
Dosja tregon lidhje të ngushta midis zyrtarëve të AKSHI-t dhe operatorëve ekonomikë, duke hedhur dritë mbi mënyrën se si institucionet dyshohet të jenë përdorur për përfitime të paligjshme.