Ish-presidenti amerikan Bill Clinton dhe bashkëshortja e tij, ish-Sekretarja e Shtetit Hillary Clinton, kanë pranuar të paraqiten personalisht në Uashington për të dëshmuar në lidhje me çështjen Jeffrey Epstein, në një përpjekje për të shmangur një votim të mundshëm në Dhomën e Përfaqësuesve që mund t’i çonte drejt akuzës për shpërfillje të Kongresit.
Megjithatë, ende nuk është e qartë nëse Kryetari republikan i Komitetit Mbikëqyrës, James Comer, do ta pranojë këtë propozim. Ai ka deklaruar se deri tani nuk ka kushte të qarta dhe as data të përcaktuara për dëshminë.
Sipas raportimeve të mediave amerikane, vendimi i Clintonëve për të dëshmuar vjen pas disa muajsh refuzimi, çka e kishte shtyrë Komitetin drejt nisjes së procedurave për shpërfillje të Kongresit, një hap që mund të sillte pasoja ligjore serioze.
Zëdhënësi i Bill Clinton, Angel Ureña, reagoi ashpër ndaj qëndrimit të Comer, duke deklaruar në rrjetin X se çifti Clinton ka vepruar “me mirëbesim” dhe ka pranuar të dëshmojë nën betim. Ai theksoi se ish-presidenti dhe ish-Sekretarja e Shtetit janë të gatshëm të krijojnë një precedent që duhet të vlejë për të gjithë.
Nga ana tjetër, Comer tha se pranimi për të dëshmuar erdhi vetëm pas kërcënimit me procedura ndëshkuese, duke shtuar se ende ka paqartësi mbi kushtet dhe se çdo hap i mëtejshëm do të diskutohet me anëtarët e komisionit.
Demokratët në Komitetin Mbikëqyrës shprehen më optimistë. Përfaqësuesi Robert Garcia deklaroi për CNN se Clintonët kanë pranuar të gjitha kushtet e vendosura dhe se dëshmia e Bill Clinton ishte kërkuar që në fillim nga demokratët.
Ndërkohë, Komiteti kishte nisur tashmë procedurat për shpërfillje të Kongresit, pasi kanë kaluar gati gjashtë muaj nga thirrja e parë për dëshmi dhe disa javë nga mungesa e tyre në seancat e planifikuara. Comer e kishte cilësuar kërkesën për trajtim të veçantë si një cenim të transparencës që kërkojnë qytetarët amerikanë.