Vendet europiane po intensifikojnë bashkëpunimin e tyre në fushën e mbrojtjes, duke përfshirë operacione të përbashkëta kibernetike dhe stërvitje ushtarake, ndërsa Rusia shton presionin mbi aleatët e NATO-s. Sulmet e përsëritura të dronëve dhe agjentëve rusë në territorin e vendeve të Aleancës kanë nxitur një reagim më proaktiv nga Brukseli dhe kryeqytetet europiane.
Siç raportojnë dy zyrtarë të lartë europianë dhe tre diplomatë të Bashkimit Evropian, Europa po përgatit disa skenarë, duke përfshirë: operacione të koordinuara kibernetike kundër Moskës, një mekanizëm më i shpejtë dhe më i unifikuar për të atribuar sulmet hibride dhe për të identifikuar menjëherë përgjegjësit, si dhe stërvitje të udhëhequra nga NATO për të testuar gatishmërinë e forcave rë armatosura.
“Rusët po testojnë vazhdimisht kufijtë tanë. Cili është reagimi? Deri ku mund të shkojmë?” tha ministrja e Jashtme e Letonisë, Baiba Braze. Ajo theksoi për POLITICO se nevojitet një përgjigje proaktive: “Dhe nuk janë fjalët që japin sinjal, është veprimi.”
Analistët paralajmërojnë se kjo qasje e re europiane shënon një ndryshim të rëndësishëm në strategjinë e kontinentit, ku koordinimi i shpejtë dhe përgjigjet konkrete pritet të funksionojnë si mjet për të frenuar veprimet destabilizuese të Moskës, duke dërguar një mesazh të qartë mbi vendosmërinë e NATO-s dhe BE-së për të mbrojtur sigurinë e aleatëve të tyre.