Mediat në Meksikë kanë publikuar një artikull të ri mbi mënyrën se si familja shqiptare Hysa dyshohet se pastroi paratë e Kartelit të Sinaloas. Sipas raportimeve, katër kazino në Sinaloa kanë pastruar më shumë se 2 milionë dollarë për kartelin, tre prej të cilave ishin nën menaxhimin e familjes Hysa.
Paratë e kartelit dyshohet se kalonin përmes kompanive fiktive, të cilat justifikonin të ardhura që në realitet nuk ekzistonin. Mediat theksojnë se kjo nuk është hera e parë që familja Hysa lidhet me dyshime për bashkëpunim me grupe kriminale.
Gazeta El Universal kishte raportuar që në vitin 2022 se autoritetet meksikane kishin hapur hetime dy vjet më parë ndaj kësaj familjeje, për dyshime mbi pastrim parash përmes kazinove dhe restoranteve. Ndërkohë, Rio Doce nënvizon se Karteli Sinaloa është një nga organizatat më të mëdha dhe më të rrezikshme të trafikimit të drogës në Meksikë, i cili trafikon sasi të mëdha narkotikësh – përfshirë fentanil dhe heroinë – drejt Shteteve të Bashkuara, duke përdorur skema të sofistikuara pastrimi parash dhe akte të dhunës.
Sipas Rrjetit të Zbulimit të Krimeve Financiare (FinCEN) të Departamentit Amerikan të Thesarit, mes viteve 2017 dhe 2024, dhjetë kazino, përfshirë Mirage në Culiacán dhe tre degë të Casino Midas në Mazatlán, Los Mochis dhe Guasave, të operuara nga familja Hysa, lehtësuan pastrimin e mbi 2 milionë dollarëve për kartelin. Këto institucione, përfshirë Casino Midas në Agua Prieta, Sonora, Rosarito, Palermo në Nogales dhe Skampa në Ensenada, sipas autoriteteve amerikane, janë të kontrolluara nga drejtuesit më të lartë të Midas Casino në Mazatlán, të cilët nga viti 2021 deri në 2023 bënë pagesa të rregullta për kartelin, përmes depozitave të shumta në para të gatshme.
FinCEN thekson se drejtuesit e lojërave të fatit kanë marrë edhe udhëzime të detajuara nga karteli për shmangien e kontrolleve kundër pastrimit të parave, duke kryer depozita të ndara deri në 90 mijë peso në ditë jo të njëpasnjëshme, për të mos u zbuluar nga autoritetet financiare. Në një rast, një degë e kartelit u ka vënë në dispozicion më shumë se 30 llogari bankare për kryerjen e depozitave.
FinCEN vëren se natyra e përsëritur e transaksioneve dhe aktivitetit financiar tregon se kazinotë kanë shërbyer si burim i rëndësishëm dhe i qëndrueshëm për pastrimin e parave të Kartelit Sinaloa. Në vitin 2024, tregtia SHBA–Meksikë arriti në 935 miliardë dollarë, ndërsa një pjesë e parave të pastruara ka përfunduar në bankat meksikane që kanë lidhje të drejtpërdrejta me institucionet financiare amerikane.
Dokumenti i datës 13 nëntor ndalon institucionet financiare amerikane të hapin ose mbajnë llogari korresponduese me bankat e huaja të lidhura me kazinotë e përfshira, duke pasur parasysh rrezikun për sistemin financiar amerikan. Sanksionet erdhën një ditë pasi Sekretari i Sigurisë Omar García Harfuch njoftoi se një hetim i gjerë ka zbuluar se 13 kazino fizike dhe virtuale në disa shtete të Meksikës kryenin operacione të parregullta dhe transferta ndërkombëtare pa justifikim.
Pas këtyre gjetjeve, autoritetet pezulluan aktivitetet e disa kazinove, bllokuan llogaritë bankare dhe nisën procedura për krime të mundshme tatimore dhe pastrim parash. Ministria e Financave tha se, në bashkëpunim me OFAC dhe FinCEN, u ndërprenë operacionet financiare të kompanive të dyshuara se janë të lidhura me kartelin e Sinaloas dhe me rrjete ndërkombëtare të pastrimit të parave që veprojnë në Meksikë, SHBA dhe Evropë.
OFAC ka identifikuar të ashtuquajturin “Grupi i Krimit të Organizuar Hysa”, të përbërë nga Luftar, Arben, Ramiz, Fatos dhe Fabjon Hysa, si dhe Eselda Baku dhe Gilberto López López, bashkë me 19 kompani të lidhura me to. UIF ka zbuluar gjithashtu pesë entitete të tjera, duke çuar totalin në 31 subjekte të përfshira në Listën e Personave të Bllokuar, pas analizave që evidentuan skema të parregullta financiare dhe triangulime të shumta ndërkombëtare.
Analizat kanë treguar se këto kompani dhe individë kishin ngritur struktura financiare të përhapura në disa shtete, për të transferuar dhe fshehur burime të paligjshme, me shuma shumë milionë dollarësh që qarkullonin mes Meksikës, SHBA-së, Kanadasë, Belizes, Panamasë, Rumanisë, Polonisë dhe Shqipërisë, duke përdorur kompani të krijuara posaçërisht për të shpërndarë fondet.
Sipas dokumenteve, Kazinoja Midas në Mazatlán operohet nga familja Hysa nëpërmjet kompanisë Entretenimiento Palermo SA de CV, e krijuar në vitin 2006 dhe e zhvendosur në Mazatlán në vitin 2024. Themelues të saj ishin Miguel Ángel Valdez Estrada dhe Arben Hysa, të cilëve më vonë iu bashkuan Luftar Hysa, Marcelo Falce García dhe në vitin 2021 Gilberto López López.