Deputetja e Partisë Demokratike, Jorida Tabaku, ka reaguar ashpër lidhur me rënien e vazhdueshme të euros, duke paralajmëruar se ky fenomen po shkakton pasoja serioze për ekonominë shqiptare, bizneset vendase dhe jetën e përditshme të qytetarëve.
Në një video të publikuar në rrjetet sociale, Tabaku thekson se euro ka arritur nivelet më të ulëta historike në kursin e këmbimit, ndërsa në vitet e fundit ka humbur rreth 40% të vlerës së saj. Sipas saj, edhe pse për disa ky zhvillim mund të duket thjesht teknik, ndikimi i tij është i drejtpërdrejtë dhe i ndjeshëm në ekonomi.
Deputetja demokrate shprehet se zhvlerësimi i euros po dëmton çmimet, eksportet, punësimin dhe qëndrueshmërinë e bizneseve shqiptare, duke e bërë të pavlefshme çdo deklaratë të qeverisë për nxitjen e eksporteve. Ajo thekson se në këto kushte, ekonomia po përballet me një goditje të fortë strukturore.
Sipas Tabakut, sektorët më të prekur janë prodhimi fason dhe bujqësia, të cilët deri më tani mbështeteshin kryesisht te eksportet. Ajo paralajmëron se produktet shqiptare po humbasin konkurrueshmërinë në tregjet ndërkombëtare, çka po ul të ardhurat e fermerëve dhe po vë në rrezik vendet e punës, veçanërisht në industrinë fason, ku janë të punësuar rreth 175 mijë persona.
Tabaku e lidh këtë situatë me, sipas saj, kriminalizimin e ekonomisë dhe qarkullimin e parave të pista, të cilat po deformojnë tregun dhe po krijojnë pasoja të rënda për ekonominë reale. Ajo thekson se mungesa e mekanizmave për të përballuar këtë fenomen po e thellon dëmin ekonomik dhe po prek drejtpërdrejt xhepin e qytetarëve.
Në përfundim, deputetja e PD-së nënvizon se rënia e euros nuk është vetëm një tregues financiar, por një rrezik real për mirëqenien e shqiptarëve, prodhimin vendas dhe të ardhmen ekonomike të vendit, në mungesë të një reagimi konkret dhe serioz nga ana e qeverisë.