Brad Karp, kryetari i firmës së njohur ligjore “Paul Weiss” në SHBA, dha dorëheqje në mënyrë të papritur të mërkurën, pas publikimit të dokumenteve që zbulojnë shkëmbimet e tij të email-eve me Jeffrey Epstein.
Në një deklaratë, Karp tha se drejtimi i “Paul Weiss” për 18 vjet ka qenë një nder i madh profesional, por raportimet e fundit kanë krijuar shpërqendrim, gjë që nuk është në interes të firmës.
Megjithatë, ai do të vazhdojë të kryejë funksione të tjera brenda kompanisë. Firma njoftoi gjithashtu se Scott Barshay do të marrë drejtimin si kryetar.
Email-et e publikuara nga Departamenti i Drejtësisë tregojnë se komunikimi mes Karp dhe Epstein vazhdoi deri në vitin 2019, vitin kur Epstein ndërroi jetë. Në një nga email-et më 22 korrik 2015, Karp e falënderoi Epsteinin për mikpritjen gjatë një mbrëmjeje që e quajti “një herë në jetë”. Epstein iu përgjigj duke thënë se Karp ishte gjithmonë i mirëpritur dhe se do të kishte shumë net të tjera me “talente unike”.
Dorëheqja e Karp vjen në një moment kritik, ndërsa firma thekson se puna ndaj klientëve do të vazhdojë pa ndërprerje dhe me përkushtim të plotë.