Besimtarët katolikë në Kosovë janë njoftuar mëngjesin e sotëm për vdekjen e parakohshme të famulltarit të Kishës Katolike “Shna Ndout”, Don Kelmend Spaqi. Meshtari ka ndërruar jetë në moshën 63-vjeçare dhe njihej gjerësisht për kontributin e tij të jashtëzakonshëm gjatë luftës së fundit në Kosovo.
Gjatë viteve 1998–1999, Don Kelmend Spaqi e shndërroi kishën e Gllogjanit në një strehë për qindra banorë shqiptarë që përndiqeshin nga forcat serbe. Sipas dëshmive të banorëve të asaj kohe, ai doli personalisht përballë paramilitarëve serbë për të negociuar lirimin e civilëve, duke u shprehur se populli ishte i pafajshëm.
Në këtë kishë nuk u strehuan vetëm besimtarë katolikë, por edhe shumë myslimanë nga fshati dhe zonat përreth, për të cilët meshtari u bë garant i jetës në momentet më kritike të ofensivave në zonën e Peja.
Një nga veprimet që la gjurmë të thella në kujtesën e banorëve ishte vendimi i tij për t’u rënë kambanave të kishës për të njoftuar kohën e iftarit dhe syfyrit për bashkëkombësit myslimanë gjatë muajit të Ramazanit. Edhe pse u mor në pyetje nga forcat serbe për këto sinjale, ai arriti t’i shmangej rrezikut duke mbrojtur civilët.
Ky veprim mbetet një nga shembujt më të veçantë të solidaritetit ndërfetar gjatë luftës në Kosovë.
Vdekja e tij ka ngjallur reagime të shumta nga krerët fetarë dhe politikë, të cilët e kanë cilësuar si një humbje të madhe për kishën dhe për vendin.