Donald Trump po formëson një ekip të ngushtë për Ballkanin, i përbërë nga ish-emisari Richard Grenell, dhëndri i tij Jared Kushner dhe ish-guvernatori Rod Blagojevich. Ky grup ka krijuar lidhje të forta me Beogradin dhe po pozicionohet për të ndikuar në dinamikat rajonale, veçanërisht në raportet mes Serbisë dhe Kosovës.
Grenell, i cili ishte i dërguari special i Trump për Ballkanin gjatë mandatit të parë, ka marrëdhënie të ngushta me presidentin serb Aleksandar Vuçiç dhe ministrin e Jashtëm Marko Gjuriç. Ai është një nga nismëtarët e projektit Trump Tower Beograd, një investim gjysmë miliardë dollarësh që do të ndërtohet në ish-shtabin e përgjithshëm të ushtrisë serbe. Ky kompleks luksoz do të përfshijë edhe një memorial për viktimat e bombardimeve të NATO-s në 1999, një simbolikë që e përforcon narrativën serbe për atë luftë.
Një tjetër lëvizje e rëndësishme është përzgjedhja e mundshme e Rod Blagojevich si ambasador i SHBA në Serbi. Ish-guvernatori i Illinois, i dënuar për korrupsion dhe më pas i falur nga Trump në 2020, është një figurë e dashur për qarqet nacionaliste serbe. Gjatë një vizite të fundit në Beograd, ai kërkoi falje për bombardimet e NATO-s dhe i krahasoi ato me agresionin e Rusisë në Ukrainë, një deklaratë që bie ndesh me qëndrimin zyrtar të Perëndimit.
Ndërkohë, Kosova duket se do të përballet me një administratë amerikane më armiqësore. Grenell ka kritikuar hapur kryeministrin Albin Kurti, veçanërisht për refuzimin e shkëmbimit të territoreve me Serbinë në 2020. Para inaugurimit të Trump, ai priti në Uashington ish-kryeministrin Ramush Haradinaj dhe deklaroi se “nuk do të ishte mirë për Kosovën” nëse Kurti mbetet në pushtet, një sinjal se ekipi i Trump mund të përpiqet të ndikojë në politikën e brendshme të Prishtinës.
Serbia ka shfrytëzuar mbështetjen në rritje nga Trump për të forcuar retorikën kundër Kosovës. Ministri i Jashtëm Gjuriç dhe presidenti Vuçiç kanë theksuar se serbët në Kosovë janë viktima të “diskriminimit”, ndërsa tensionet ushtarake janë rritur, me dislokime trupash serbe pranë kufirit me Kosovën. Në vitin 2023, këto lëvizje u përballën me sanksione nga BE – paradoksalisht, jo ndaj Serbisë, por ndaj Kosovës.
Ekspertët ndërkombëtarë paralajmërojnë se ndikimi i administratës Trump në Ballkan mund të prekë jo vetëm Kosovën, por edhe Bosnjën. Analistët si Daniel Serwer dhe Kurt Bassuener shohin një rrezik të madh që Beogradi të inkurajojë secesionistët serbë në Bosnjë, duke e bërë më të mundshëm një përshkallëzim të konflikteve. Ata dyshojnë se SHBA nën Trump do të ndërhynte ushtarakisht për të frenuar Serbinë, gjë që do ta bënte situatën edhe më të paqëndrueshme.
Me një ekip të lidhur fort me Beogradin dhe një retorikë gjithnjë e më agresive ndaj Kosovës, Ballkani përballet me një realitet të ri gjeopolitik. Ndikimi i Trump dhe mbështetja e tij për Vuçiçin mund të ndryshojnë ekuilibrat e fuqisë në rajon, duke vënë në pikëpyetje jo vetëm stabilitetin e Kosovës, por edhe të Bosnjës.