Norvegjia ka nisur një hetim ndaj ish-kryeministrit Thorbjorn Jagland, nën dyshimin për korrupsion që lidhet me kontaktet e tij me financierin amerikan Jeffrey Epstein.
Jagland ka shërbyer si kryeministër i Norvegjisë nga viti 1996 deri në vitin 1997. Më pas ai ishte sekretar i përgjithshëm i Këshillit të Evropës në periudhën 2009–2019 dhe kryetar i Komitetit Norvegjez të Nobelit nga viti 2009 deri në vitin 2015.
Në një deklaratë të enjten, agjencia norvegjeze kundër korrupsionit, Okokrim, bëri të ditur se i ka kërkuar Ministrisë së Jashtme heqjen e imunitetit diplomatik që Jagland gëzon si ish-diplomat. Sipas kreut të Okokrim, Pal Lonseth, hetimi do të fokusohet nëse Jagland ka marrë dhurata apo favore në lidhje me pozicionet që ka mbajtur.
Emri i politikanit përmendet disa herë në dokumentet e publikuara së fundmi nga autoritetet amerikane, që lidhen me pasurinë dhe komunikimet e Epstein.
Në një email të majit 2012, Jagland i shkruante Epstein se kishte qenë në Tiranë dhe e përshkruante udhëtimin e tij. Në një tjetër email, të janarit 2013, ai përmendte planet për të vizituar ishullin privat të Epstein në Karaibe së bashku me familjen e tij.