Partia Demokratike e Kosovës (PDK) ka vlerësuar rezultatet e zgjedhjeve si një fitore të rëndësishme për partinë, duke e konfirmuar atë si forcën e dytë më të madhe në vend.
Zëdhënësi i fushatës së PDK-së, Blerand Stavileci, deklaroi se votat e marra tregojnë se qytetarët janë të pakënaqur me qeverinë aktuale dhe po kërkojnë ndryshim politik.
“PDK ka arritur një rezultat të madh, është konfirmuar si forca e dytë më e madhe në vend me mbi 200 mijë vota. Ky është një sukses i pamohueshëm dhe një mesazh i fortë nga qytetarët, të cilët e kanë kthyer shpinën kësaj qeverie,” tha Stavileci.
Ai falënderoi votuesit që mbështetën PDK-në dhe shtoi se rezultatet tregojnë qartë se shumica kërkon një qeveri të re.
Lidhur me mundësinë e koalicioneve pas zgjedhjeve, Stavileci tha se vendimet për hapat e mëtejshëm do të bëhen publike pas finalizimit të rezultateve.
“Ditëve në vijim, me përfundimin e plotë të numërimit të votave, kryetari i PDK-së dhe kandidati i partisë do të dalin me qëndrime se si do të vazhdohet më tutje,” përfundoi ai.