Sonte në mbrëmje, Çelsi pret në shtëpi Mançester Sitin kampion në fuqi në një sfidë që pritet të ofrojë rivalitet në fushën e lojës.
Tekniku i bluve të Londrës, Graham Poter u shpreh optimist para përballjes duke thënë se skuadra e tij ka një plan të mirëdetajuar se si do e interpretojë ndeshjen ndaj skuadrës së Pep Guardiolës. Poter shtoi se të besuarit e tij nuk do të fokusohen vetëm në ndalimin e Halandit pasi synimi është bllokimi i manovrës së Mançester Sitit që krahas sulmuesit norvegjez, posedon dhe shumë kualitete të tjera në organikë.
“Haland ka pasur një sezon fantastik dhe golat e tij janë të shkëlqyer. Mançester Siti është një skuadër klasi, por ne duhet të mendojmë për veten, sesi mund të bëjmë më mirë dhe hapa përpara në lojën tonë. Kjo është qasja që do të kemi. Ne duhet të luajmë mirë, ky është çelësi. Pastaj duhet të kuptosh cilësinë që kanë. Ata janë një skuadër klasi, por ne mund t’u hapim probleme. Mund të luajmë lojën tonë dhe t’i vendosim nën presion. Duhet ta shfrytëzojmë ‘Stanford Bridge’ dhe më pas të shohim se çfarë ndodh.”- tha Poter në konferencën e tij për shtyp.
Çelsi do të synojë fitoren e parë ndaj qytetarëve, pasi ajo mungon që nga finalja e Championsit në vitin 2021. Siti nga ana tjetër vjen në Londër për të marrë tre pikët që do e afronin me Arsenalin kryesues i cili u ndal në barazimin pa gola ndaj Njukasëllit.