Kreu i qeverisë u shpreh gjatë komunikimit të përditshëm në rrjetet sociale se sistemi i patronazhimit në partinë që ai drejton e ka rritur ndjeshëm punën dhe angazhimin para zgjedhjeve të 11 majit.
Edi Rama iu përgjigj pyetjes së një ndjekësi, duke thurur elozhe për patronazhistët, të cilët janë akuzuar nga opozita për cenim të privatësisë dhe posedim të paligjshëm të të dhënave personale të shumë shtetasve.
**“Sot PS ka skuadrën më të re. Kush do të reja dhe të rinj, i ka në skuadrën tonë me shumicë në listën e mbyllur. Ky është ndryshim i madh me të tjerët. Të shkosh të votosh ato moçalishtet e reja që janë hapur, me rastin më të mirë çon në parlament një person. Të rinjtë dhe të rejat janë baza e gjeneratës tjetër të lidershipit të PS. Tani një tjetër gjeneratë po rritet hap pas hapi në akademinë politike. Kemi bërë një transformim radikal të skuadrës që kishim…
Patronazhistët i kemi në super formë këtë vit. Patronazhimin e kemi ngritur në një nivel tjetër. I kam thënë atyre që i shajnë: mos i ngacmoni, mos i cysni, sepse janë shumë të fokusuar te puna dhe janë vërtet qeliza të PS. Kush nuk është në PS, nuk e kupton se për çfarë po flas. Një ndryshim shumë themelor mes nesh dhe të tjerëve është se ata nuk janë parti”** – u shpreh Rama.