Pas një beteje të gjatë dhe të ndërlikuar ligjore, Qendra “Res Publica” ka arritur një fitore të rëndësishme kundër Bashkisë Tiranë, duke rrëzuar vendimin e kësaj të fundit për ndërtimin e rrugës “Hajdar Kërçiku” në zonën TR/7. Sipas vendimit të gjykatës, Plani i Detajuar Vendor (PDV) i miratuar nga Bashkia Tiranë, që parashikonte ndërtimin e kësaj rruge, është i pavlefshëm.
Gjatë gjykimit, Qendra “Res Publica” provoi se Kryetari i Bashkisë Tiranë ka tejkaluar kompetencat e tij, pasi miratimi i ndërtimit të rrugëve të reja bie nën juridiksionin e Këshillit Kombëtar të Territorit dhe jo të Bashkisë.
Për më tepër, u provua se vendimi për ndërtimin e rrugës është marrë në kushtet e konfliktit të interesit, duke marrë parasysh lidhjet familjare të Kryetarit të Bashkisë me pronat që vetëm zhvillimi i rrugës së re ua rrit vlerën disafish. Konkretisht, pronar i truallit të cilit do t’i shërbente rruga e krijuar rishtazi, në kohën e miratimit të planit, ka qenë Ajola Xoxa, bashkëshortja e Erion Veliajt, dhe nëna e saj (trashëgimtare të Arben Xoxës).
Përveç mungesës së kompetencës dhe konfliktit të interesit, gjatë gjykimit u provua se Plani Vendor është miratuar në shkelje të rënda procedurale nga ana e Bashkisë Tiranë. PDV-ja rezultoi se përmbante fakte të falsifikuara, pasi rruga “Hajdar Kërçiku” nuk ekzistonte në terren dhe nuk ishte parashikuar në Planin e Përgjithshëm Vendor. Gjithashtu, procesi i miratimit të PDV-së është zhvilluar pa respektuar procedurat e konsultimit publik me banorët e zonës, siç kërkohet nga ligji.
Ndërtimi i rrugës në këtë nënnjësi nuk kishte një justifikim të arsyeshëm në interesin urbanistik, si për shembull për të shkarkuar trafikun e automjeteve, pasi nënnjësia kishte një rrugë të ndërmjetme që shërbente për këtë qëllim, njësoj si nënnjësia tjetër.
Përkundrazi, ky projekt çekuilibron interesat private dhe publike, ku ndërtimi i rrugës do të sillte përfitime për vetëm dy parcela ndërtimi (njëra prej të cilave kishte lidhje familjare me Kryetarin e Bashkisë), duke krijuar kosto të shumëfishta. Nga njëra anë, do të hiqte mundësinë e zhvillimit të shumë pronave të tjera, mes tyre edhe objekte me potencial për t’u shpallur monument kulture (si tre prona të familjes Çokut), dhe nga ana tjetër, do të ngarkonte financat publike me një faturë financiare për ndërtimin dhe zgjerimin e saj.
Ky vendim është një fitore e rëndësishme për pronarët autoktonë në një zonë qendrore të Tiranës, për disa objekte që kanë potencial për t’u shpallur monument kulture, për ruajtjen e financave publike dhe, mbi të gjitha, për ligjshmërinë e vendimmarrjes publike. Edhe kësaj here, gjykata u rendit në anën e së drejtës.
Qendra “Res Publica” i është veçanërisht mirënjohëse Lindita Çokut dhe Shoqnisë Tirona Autoktone për mbështetjen dhe kontributin e tyre të vyer në këtë proces gjyqësor./ Res Publica