Administrata e Donald Trump po analizon skenarë për vendosjen e mijëra trupave shtesë në Iran, ndërsa përplasjet në Lindjen e Mesme kanë hyrë në javën e tretë.
Sipas burimeve amerikane, ky hap synon të forcojë pozicionin e Shteteve të Bashkuara dhe të sigurojë kalimin e cisternave të naftës në Ngushticën e Hormuzit, një nyje kyçe për tregtinë globale të energjisë.
Në opsionet e diskutuara përfshihet edhe vendosja e trupave në bregdetin iranian dhe në Ishullin Kharg, nga ku përpunohet rreth 90% e eksporteve të naftës së Iranit. Megjithatë, një operacion i tillë vlerësohet me rrezik të lartë për shkak të kapaciteteve të Iranit në raketa dhe dronë.
Ndërkohë, SHBA-ja ka kryer tashmë goditje ndaj objektivave ushtarake iraniane, përfshirë sulme në Ishullin Kharg më 13 mars. Presidenti Trump ka paralajmëruar edhe mundësinë e goditjes së infrastrukturës energjetike, ndërsa ekspertët sugjerojnë se kontrolli i këtyre objekteve mund të jetë alternativë ndaj shkatërrimit të tyre.
Një tjetër skenar i diskutuar është sigurimi i rezervave të uraniumit të pasuruar të Iranit, një mision që konsiderohet shumë kompleks dhe i rrezikshëm.
Megjithatë, zyrtarë nga Shtëpia e Bardhë theksojnë se ende nuk është marrë vendim për dërgimin e trupave tokësore dhe se “të gjitha opsionet mbeten në tryezë”.
Sipas Komandës Qendrore të SHBA-së, ushtria amerikane ka kryer mbi 7,800 sulme që nga 28 shkurti, duke goditur flotën detare iraniane, depot e raketave dhe dronëve, si dhe industrinë e mbrojtjes.