Gjatë dëshmisë së tij, James Rubin deklaroi se ish-ndërmjetësi amerikan për Kosovën në bisedimet e Rambujesë, Christopher Hill, kishte tentuar të dëmtonte figurën e tij dhe të sekretares së atëhershme të Shtetit, Madeleine Albright.
“Christopher Hill kishte njëanshmëri që e vëreja gjatë gjithë kohës së tij si udhëheqës – njëanshmëri në favor të LDK-së dhe kundër UÇK-së. Unë nuk kisha asnjëanshmëri dhe isha i ftuar të punoja me udhëheqësin e zgjedhur të organizatës,” tha Rubin.
Ai theksoi se Hill kishte tentuar të zvogëlonte rolin e tij dhe, në mënyrë të përsëritur, edhe atë të sekretares Albright, duke pretenduar gabimisht se ajo kishte favorizuar Hashim Thaçin si udhëheqës të delegacionit të UÇK-së. Sipas Rubin, në të vërtetë, ishte delegacioni shqiptar i Kosovës që e kishte zgjedhur Thaçin, dhe miratimi i tij ishte i domosdoshëm për arritjen e objektivave në Rambuje.
I pyetur nga prokurori nëse Albright e kishte inkurajuar të krijonte marrëdhënie me Thaçin gjatë konferencës, Rubin u përgjigj pohimisht, duke thënë se përqendrimi i tij ishte posaçërisht te Thaçi.
Ndërsa për pyetjen nëse i kishte dhënë këshilla për veshjen, Rubin u shpreh se kjo nuk ishte e nevojshme, duke shtuar se për këtë çështje kishte folur Christopher Hill.