Mbrojtja ajrore ruse ka neutralizuar dhjetëra dronë ukrainas që fluturonin në drejtim të Moskës të dielën në mbrëmje, duke detyruar autoritetet të mbyllin përkohësisht dy nga katër aeroportet e kryeqytetit. Lajmin e bëri të ditur kryebashkiaku Sergei Sobyanin përmes një postimi në Telegram.
Sipas tij, gjatë një operacioni që zgjati rreth pesë orë, sistemet ruse të mbrojtjes ajrore rrëzuan gjithsej 28 dronë armik. Rreth orës 00:40 pas mesnate, Agjencia Federale e Aviacionit Civil (Rosaviatsiya) njoftoi pezullimin e përkohshëm të fluturimeve në aeroportet Domodedovo dhe Zhukovsky për arsye sigurie.
Autoritetet ruse raportuan se nuk pati dëme materiale apo viktima si pasojë e sulmeve. Megjithatë, Moska rrallëherë publikon të dhëna të plota mbi pasojat e sulmeve ajrore ukrainase, përveç rasteve kur ato prekin objektiva civilë.
Nga ana tjetër, Ukraina nuk ka dhënë ende ndonjë reagim zyrtar. Kievi ka përsëritur se goditjet e tij kanë për qëllim infrastrukturën që mbështet operacionet ushtarake të Rusisë në territorin ukrainas.