Ish-deputeti i Partisë Demokratike, Ervin Salianji, ka reaguar ashpër ndaj ish-kolegut të tij, Flamur Noka, duke e cilësuar si “aksidentin më të madh politik në 35 vite të PD”. Në një deklaratë të fortë, Salianji e akuzon Nokën për lidhje me krimin e organizuar, pazare me ministra dhe për shërbim ndaj regjimit të Edi Ramës.
Salianji thekson se Noka ka shitur parime dhe interesa për pushtet personal, duke larguar qytetarë dhe profesionistë nga Partia Demokratike. “Ai nuk është thjesht një gabim politik, as vetëm idiot apo i përdorur si gojëprishur për të zhvendosur vëmendjen. Ky është produkt i politikës së pistë: pazare, shërbime, nënshtrim dhe tregti interesi,” deklaroi ish-deputeti.
Ai gjithashtu e cilëson Nokën si një “humbës serial”, duke theksuar se fytyra e tij është e pranishme në çdo palë zgjedhje që nga viti 2013, por gjithmonë fitues në pazare personale. Salianji denoncon gjithashtu lidhjet e tij me banda dhe oligarkë, përfshirë situata në Kukës ku, sipas tij, Noka “shiti bashkinë për interesa të ulëta, duke hapur rrugë Safet Gjicit dhe rrethit kriminal që e shoqëronte”.
Salianji përfundon me thirrje për një reformë të thellë brenda Partisë Demokratike, duke theksuar se figura të tilla duhet të largohen për të pastruar partinë nga korrupsioni dhe interesat e ngushta personale. Ai premton se do të sjellë fakte dhe dëshmi të tjera për lidhjet e Nokës me figura të ndryshme të politikës dhe biznesit, duke nënvizuar se vetë nuk ka lidhje me këto kategori.