Agjencitë amerikane të inteligjencës kanë paralajmëruar se Ballkani Perëndimor mbetet një zonë me rrezik të lartë paqëndrueshmërie, duke theksuar rolin destabilizues të Rusisë në rajon.
Në raportin vjetor të kërcënimeve për vitin 2026 thuhet se lufta në Ukrainë ka thelluar përplasjet mes Perëndimit dhe Rusisë, një ndikim që reflektohet drejtpërdrejt edhe në Ballkan. Sipas dokumentit, Moska mbështet Serbinë në raport me Kosovën dhe nxit tensione politike mes tyre.
Raporti përmend gjithashtu mbështetjen ruse për tendencat ndarëse në Republikën Srpska, duke rritur rrezikun për destabilizim në Bosnjë dhe Hercegovinë. Sipas inteligjencës amerikane, ndarjet etnike dhe politike në rajon mbeten të thella dhe mund të shfrytëzohen nga aktorë të jashtëm.
Ballkani përshkruhet si një zonë ku përplasen interesat e fuqive të mëdha, ndërsa çështjet e pazgjidhura – si marrëdhëniet Kosovë–Serbi dhe krizat e brendshme në Bosnjë dhe Hercegovinë – vazhdojnë të jenë burim tensioni.
Raporti paralajmëron edhe për rreziqe më të gjera, si dezinformimi, ndërhyrjet politike, sulmet kibernetike dhe terrorizmi, duke e cilësuar rajonin si një nga më të ndjeshmit në Evropë ndaj ndikimeve destabilizuese.