Deputeti Agron Shehaj ka sulmuar ashpër qeverinë në Kuvend, duke akuzuar kryeministrin Edi Rama, ministrin Taulant Balla dhe mazhorancën për shmangie të llogaridhënies lidhur me çështjen Balluku.
Ai deklaroi se prej dy muajsh ka kërkuar interpelancë me ish-ministren Belinda Balluku, dhe ka bërë të njëjtën kërkesë edhe për kryeministrin, të cilin e akuzoi se po i largohet përgjegjësisë.
“Nuk e di se si do ta zgjidhim këtë problem të mohimit të të drejtës për interpelancë. Kam kërkuar në 2 muaj me Ballukun, por tani nuk është më ministre. I shpëtoi interpelancës por përfundoi më keq. Por kam një kërkesë për interpelancë edhe me kryeministrin. E kuptoj se kërkoni të shmangni llogaridhënien, por s’i shpëtoni dot”, tha Shehaj.
Deputeti paralajmëroi mazhorancën se nuk mund të shmangë daljen përpara drejtësisë dhe kritikoi sulmet e qeverisë ndaj institucioneve të drejtësisë. Ai tha se çështja nuk lidhet me individë të veçantë, por kërkon përgjegjësi të qartë: “Duhet të jepni llogari dhe nuk keni çfarë t’i bëni drejtësisë, SPAK ka mbrojtjen ndërkombëtare. Sulmet qesharake që bëni çdo ditë nuk e ndryshojnë këtë fakt.”
Shehaj përmendi gjithashtu shqetësimet për ndikimin e çështjes Balluku në jetën e qytetarëve dhe paralajmëroi se qeveria duhet të bashkëpunojë me drejtësinë: “Nuk e shmangni dot daljen para drejtësisë”.