Detaje të reja po dalin në pah lidhur me ngjarjen e rëndë që tronditi Zvicrën në orët e para të Vitit të Ri. Të paktën 40 persona kanë humbur jetën dhe qindra të tjerë janë plagosur si pasojë e një shpërthimi të fuqishëm që ndodhi në barin “Le Constellation”, në Crans-Montana, një nga resortet më prestigjioze të skijimit në vend. Lajmi është konfirmuar nga Sky News, duke iu referuar autoriteteve lokale.
Policia kantonale e Valais ka bërë të ditur se, bazuar në të dhënat e deritanishme, ngjarja nuk lidhet me ndonjë akt terrorist. Sipas deklaratës zyrtare, shpërthimi u pasua nga një zjarr i madh brenda lokalit, duke shkaktuar një bilanc të rëndë viktimash. Mediat lokale raportojnë se numri i të prekurve mund të jetë edhe më i lartë.
Incidenti ndodhi rreth orës 01:30 të mëngjesit sipas kohës lokale, në kulmin e festimeve të ndërrimit të viteve. Zona përreth është rrethuar plotësisht nga forcat e sigurisë, ndërsa policia ka vendosur edhe një ndalim të përkohshëm të fluturimeve mbi Crans-Montana për arsye sigurie.
Pamjet e publikuara nga mediat zvicerane tregojnë ndërtesën e përfshirë nga flakët dhe praninë e madhe të forcave të emergjencës, ambulancave dhe zjarrfikësve në vendngjarje. Sipas gazetës Blick, mbi 100 persona ndodheshin brenda lokalit në momentin e shpërthimit, ndërkohë që kapaciteti maksimal i tij ishte rreth 300 persona. Autoritetet po hetojnë nëse janë respektuar rregullat e sigurisë dhe kufiri i lejuar i kapacitetit.
“Le Constellation” ishte prej dekadash një nga pikat më të njohura të jetës së natës në Crans-Montana. Sipas BBC-së, lokali kishte qenë në funksion për të paktën 40 vjet dhe gëzonte popullaritet të madh në komunitetin vendas. Ndryshe nga imazhi luksoz i resortit, bari njihej për profilin e tij më popullor dhe rinor, duke tërhequr si banorë vendas ashtu edhe turistë.
Lokali përfshinte një kat të sipërm me ekrane për transmetimin e ndeshjeve sportive dhe një bodrum të gjerë me bar dhe hapësirë vallëzimi, ku zhvillohej pjesa kryesore e aktivitetit gjatë natës. Sipas një ish-klienti të cituar nga Blick, bodrumi kishte vetëm një dalje emergjence dhe ekzistojnë dyshime se numri i klientëve nuk monitorohej rreptësisht.
Hetimet për shkaqet e shpërthimit dhe të zjarrit janë në vijim, ndërsa autoritetet zvicerane pritet të japin më shumë informacion zyrtar në orët dhe ditët në vazhdim.