Sot mbahet seanca e fundit e deklaratave përmbyllëse në rastin ndaj ish-presidentit të Kosovës, Hashim Thaçi, ish-kryeparlamentarit Kadri Veseli, ish-deputetit Jakup Krasniqi dhe Rexhep Selimi në Gjykata Speciale në Hagë.
Avokati i Thaçit, Lluka Mishetiç, deklaroi se nuk ekziston asnjë provë që Thaçi të ketë pasur rol në kryerjen e krimeve të pretenduara ose në transmetimin e “qëllimit të përbashkët kriminal” të të akuzuarve. Ai tha se ZPS (Zyra e Prokurorit të Specializuar) dështoi të sjellë prova të mbështetura dhe se kishte premtuar shumë, por nuk i realizoi ato.
“Mbrojtja e di që do të pranoni provat tona. ZPS nuk dëshiron të bëni punën tuaj, por të gjejë prova që ata nuk arritën të gjenin. Ata dështuan,” tha Mishetiç, duke shtuar se Zyra e Prokurorit bëri “mëkat të madh” duke premtuar spektakël, por duke paraqitur asgjë konkrete.
Ai gjithashtu kritikoi ndryshimin e paraqitjes së provave nga Prokuroria në javën e fundit, duke përfshirë takime që nuk ishin pjesë e dosjes përfundimtare, si ato të 23 korrikut, 19 nëntorit dhe 20 dhjetorit 1998, për të mbushur boshllëqet në akuzë.
Sipas mbrojtjes, konsensusi i dëshmitarëve dhe provave ndërkombëtare dhe brenda UÇK-së nuk lidh Thaçin me ndonjë krim lufte apo politikë që synonte kundërshtarët, duke theksuar se akuzat e Prokurorisë nuk kanë mbështetje faktike.