Oficerët e Byrosë Kombëtare të Hetimit, me urdhër të SPAK, kanë sekuestruar telefonin celular të Drejtorit të Përgjithshëm të Policisë së Shtetit, Ilir Proda. Veprimi është kryer brenda një hetimi penal në zhvillim, pa u dhënë ende detaje mbi akuzat konkrete apo statusin e tij ligjor.
Ky zhvillim ndodh pak ditë pas pezullimit nga detyra të nëndrejtorit të Policisë së Tiranës, Erion Ismailaj, i dyshuar për përfshirje në veprime të paligjshme, përfshirë ndihmë ndaj personave të lidhur me një rast pengmarrjeje. Hetimet kanë ngritur dyshime për lidhje mes zyrtarëve të policisë dhe individëve të përfshirë në aktivitete kriminale dhe korrupsion.
Burime pranë hetimeve bëjnë me dije se SPAK po shqyrton një skemë më të gjerë, ku disa struktura të Policisë dyshohet të jenë përfshirë në bashkëpunim me grupe kriminale, duke përfshirë ryshfete, aktivitete të paligjshme dhe abuzime me pushtetin. Sekuestrimi i telefonit të kreut të Policisë shihet si një hap kyç drejt thellimit të hetimeve që mund të ndikojnë edhe në nivele të larta drejtuese.