Të paktën 13 persona kanë humbur jetën pas një sulmi ajror të raportuar në zonën Qaleh Mir, në qarkun Baharestan, një nga zonat me popullsi të dendur në provincën e Teheranit.
Sipas agjencisë iraniane “Fars News Agency”, të cituar nga mediat ndërkombëtare, forcat e Shteteve të Bashkuara të Amerikës dhe Izraelit kanë bombarduar dy njësi banimi, duke shkaktuar viktima dhe dëme të konsiderueshme materiale.
Guvernatori i qarkut Baharestan bëri të ditur se operacionet e kërkim-shpëtimit janë ende në zhvillim. Ekipet e emergjencës po punojnë për të pastruar rrënojat dhe për të gjetur persona të mundshëm të bllokuar nën to.
Autoritetet lokale nuk kanë dhënë ende një bilanc përfundimtar të viktimave, ndërsa situata në zonë mbetet e tensionuar pas sulmit.