Reza Pahlavi, djali i Shahut të fundit të Iranit dhe një nga figurat më të njohura të opozitës iraniane në mërgim në Shtetet e Bashkuara, u ka bërë thirrje forcave të sigurisë në Iran që të bashkohen me popullin, në një kohë kur regjimi teokratik në Teheran po përpiqet të shtypë me forcë protestat më të mëdha të viteve të fundit në vend. Sipas vlerësimeve, numri i viktimave ka kaluar mbi 500.
Në një mesazh të publikuar në platformën X, në gjuhën persiane dhe angleze, Pahlavi iu drejtua punonjësve të institucioneve publike, si dhe anëtarëve të forcave të armatosura dhe shërbimeve të sigurisë, duke theksuar se ata ndodhen përballë një zgjedhjeje vendimtare: të qëndrojnë në krah të popullit dhe të bëhen aleatë të kombit, ose të rreshtohen me ata që ushtrojnë dhunë ndaj qytetarëve.
Duke iu drejtuar gjithashtu iranianëve që jetojnë jashtë vendit, ai deklaroi se ambasadat dhe konsullatat iraniane u përkasin qytetarëve të Iranit. Pahlavi u bëri thirrje që këto ndërtesa të zbukurohen me flamurin kombëtar iranian, duke iu referuar flamurit të ish-monarkisë së rrëzuar gjatë revolucionit islamik të vitit 1979, i cili më pas u zëvendësua nga flamuri i Republikës Islamike.
Ndërkohë, të shtunën, qindra protestues u mblodhën përpara ambasadës iraniane në Londër. Gjatë demonstratës, një person u ngjit në ballkonin e ndërtesës dhe për disa momente zëvendësoi flamurin e Republikës Islamike me flamurin e monarkisë, në shenjë proteste kundër regjimit në Teheran.