Tensionet mes Shteteve të Bashkuara të Amerikës dhe Izraelit janë rritur gjatë operacioneve të fundit ushtarake kundër Iranit, sipas një raporti të publikuar nga The New York Times.
Sipas gazetës amerikane, zyrtarët e Uashingtonit kishin paralajmëruar kryeministrin izraelit Benjamin Netanyahun që të mos sulmonte rezervuarët e mëdhenj të naftës pranë Teheranit, por këto këshilla nuk u morën parasysh.
Raporti thekson se në fund të shkurtit disa zyrtarë të lartë izraelitë i kishin sugjeruar Netanyahut se, nëse sulmet fillestare do të eliminonin një pjesë të madhe të udhëheqjes iraniane, përfshirë edhe liderin suprem Ali Khamenein, atëherë mund të shpërthenin protesta masive që do të çonin në rrëzimin e regjimit.
Ky skenar iu përcoll edhe presidentit amerikan Donald Trump, i cili në një mesazh drejtuar popullit iranian pas nisjes së operacioneve deklaroi se, pas përfundimit të tyre, qytetarët mund të merrnin vetë në dorë drejtimin e vendit.
Megjithatë, sipas zhvillimeve në terren, kjo nuk ka ndodhur. Në vend të protestave kundër regjimit, në Teheran janë zhvilluar kryesisht demonstrata proqeveritare, të nxitura nga zemërimi për luftën dhe incidentet gjatë operacioneve ushtarake.
Në një intervistë për Fox News, Trump pranoi se represioni i organizatës paraushtarake Basij, e lidhur me Islamic Revolutionary Guard Corps, është një pengesë e madhe për protestuesit, pasi sipas Trumpit ata kërcënohen me dhunë nëse dalin në rrugë.