Presidenti i Shteteve të Bashkuara, Donald Trump, ka paralajmëruar zhvillime të reja në raport me Iranin përmes një postimi në rrjetin social Truth Social.
Në mesazhin e tij, Trump-i përdori një gjuhë të ashpër ndaj Iranit, duke shkruar se gjatë ditës do të shihet se çfarë do t’u ndodhë atyre që, sipas tij, kanë kryer krime për dekada. Ai theksoi se Irani ka vrarë njerëz të pafajshëm në mbarë botën për 47 vjet dhe se tani, si presidenti i 47-të i Shteteve të Bashkuara, po ndërmerr veprime kundër tyre.
Në deklaratën e tij, presidenti pretendoi se SHBA po e godet rëndë regjimin iranian në shumë drejtime, duke përfshirë aspektin ushtarak dhe ekonomik. Sipas tij, marina dhe forca ajrore e Iranit janë shkatërruar, ndërsa raketat, dronët dhe kapacitetet e tjera ushtarake janë neutralizuar.
Presidenti amerikan gjithashtu kritikoi raportimet e disa mediave, duke përmendur gazetën The New York Times, për të cilën tha se krijon përshtypjen e gabuar sikur SHBA nuk po fiton.
Në fund të postimit, Trump-i theksoi se Shtetet e Bashkuara kanë një fuqi të madhe ushtarake dhe municione të shumta, duke lënë të kuptohet se zhvillime të tjera mund të ndodhin së shpejti.