Marrëveshja e armëpushimit mes Izraelit dhe Hamasit po përballet me tensione të reja, ndërsa Presidenti amerikan Donald Trump nuk e përjashton mundësinë e rifillimit të operacioneve ushtarake nëse Hamasi nuk përmbush detyrimet e tij.
Plani 20-pikësh i paqes, që konsiderohet si faza tjetër e procesit, ka shkaktuar reagim në Washington. Trump ka paralajmëruar se përballë vonesave në dorëzimin e trupave të pengjeve dhe raporteve për sulme ndaj milicive, çdo opsion është mbi tavolinë.
Hamasi deklaroi se ka dorëzuar trupat e të gjithë pengjeve që kishte në kontroll, por Izraeli ka njoftuar OKB-në se hyrja e ndihmave humanitare në Gaza mund të vonohet, pasi vetëm 28 trupa janë kthyer – rreth një e treta e atyre që priteshin brenda afatit 72-orësh të armëpushimit.
Në këtë klimë pasigurie, ministri izraelit i Mbrojtjes, Israel Katz, ka urdhëruar ushtrinë të përgatisë një plan të ri luftarak në rast të dështimit të marrëveshjes. Sipas Ministrisë së Mbrojtjes, ky plan do të vihet në zbatim nëse Hamasi nuk respekton kushtet e paqes së propozuar nga Trump.
Duke folur për CNN, presidenti amerikan deklaroi se Izraeli mund të rikthehet në Gaza “sapo të jap urdhrin”, në rast se militantët palestinezë nuk çarmatosen dhe nuk zbatojnë pikat e marrëveshjes. Ai konfirmoi se pavarësisht dorëzimit të një pjese të trupave, shumica e pengjeve të vdekur ende nuk janë kthyer.
Trump komentoi edhe ekzekutimet e personave të dyshuar për bashkëpunim me Izraelin nga Hamasi, duke thënë se situata “do të zgjidhet shpejt” dhe se po hetohet nëse viktimat ishin civilë apo pjesëtarë të grupeve të armatosura.
Ndërsa shprehu optimizëm për perspektivat e paqes, Trump theksoi se mbështetja ndërkombëtare është e gjerë: “Pesëdhjetë e nëntë vende janë të përfshira në këtë proces. Nuk kemi parë kurrë një angazhim të tillë më parë.”
Ai shtoi se disa shtete të rajonit synojnë të përfshihen në Marrëveshjet e Abrahamit, duke argumentuar se “Irani nuk është më problem” në këtë pikë.
Paralelisht me zhvillimet në Lindjen e Mesme, Trump tha se po punon edhe për krizën në Ukrainë, duke e krahasuar kohëzgjatjen e dy konflikteve: “Njëri zgjat tre vjet, tjetri tre mijë.”
Armëpushimi mbetet në fuqi, por dritarja për rifillimin e luftimeve mbetet e hapur, teksa dorëzimi i ngadalshëm i pengjeve dhe tensionet politike rrezikojnë procesin e paqes.