Lëvizja Vetëvendosje ka deklaruar se asnjë subjekt politik i përfshirë në aktivitete terroriste, përfshirë sulmin në Banjskë, nuk duhet të lejohet të marrë pjesë në zgjedhjet e Kosovës. Sipas VV-së, pjesëmarrja e një partie që lidhet me akte dhune dhe terrorizmi përbën kërcënim serioz për demokracinë, rendin juridik dhe sigurinë kombëtare.
Në reagimin e saj, VV thekson se lejimi i një partie të tillë në zgjedhje do të nënkuptonte legjitimimin e terrorit si mjet politik, do të minonte besimin e qytetarëve në institucionet shtetërore dhe do të rrezikonte integritetin e procesit zgjedhor.
Partia shpjegon se vota kundër Listës Serbe bazohet në dyshimet e forta për përfshirjen e saj në organizimin e sulmit të nxitur nga Serbia në Banjskë, si dhe në faktin se ky subjekt nuk është distancuar asnjëherë nga aktet e dhunshme.
VV ngre shqetësimin për presionin e vazhdueshëm që, sipas saj, Beogradi ushtron mbi qytetarët serbë të Kosovës përmes Listës Serbe, përfshirë intimidime, kërcënime dhe incidente të rënda. Kjo situatë, sipas partisë, ua pamundëson serbëve në Kosovë ushtrimin e lirë të të drejtave të tyre demokratike, duke shkelur standardet ndërkombëtare.
Lëvizja thekson se qëndrimi i saj nuk ka të bëjë me diskriminimin e komunitetit serb apo mohimin e përfaqësimit politik, por është kundër akteve terroriste që cenojnë shtetësinë e Kosovës dhe kundër klimës së frikës që u imponohet qytetarëve serbë.
Në përmbyllje, VV përforcon se mbështet të drejtën e çdo qytetari, përfshirë serbët e Kosovës, që të zgjedhin lirshëm përfaqësuesit e tyre, pa ndërhyrje politike, presion apo dhunë.