Presidenti i Shteteve të Bashkuara, Donald Trump, urdhëroi ndërprerjen e përkohshme të ndihmave ushtarake për Ukrainën pas debateve me Volodimir Zelenskin në Zyrën Ovale.
Sekretari amerikan i Shtetit, Marko Rubio, e arsyetoi këtë vendim si përpjekje konkrete për të bindur Rusinë të ulet në tryezën e bisedimeve.
Në Ukrainë e shohin këtë vendim si presion për të pranuar kushtet e përfundimit të luftës, për të cilat Kievi ka theksuar se janë të papranueshme.
Volodimir Zelenski ka shprehur gatishmëri për nënshkrimin e marrëveshjes për mineralet e rralla me Shtetet e Bashkuara, por ka hedhur poshtë mundësinë e lëshimeve territoriale në favor të Rusisë, duke u shprehur se nuk mund të shesë atdheun e tij.
Trump vijon akuzat ndaj Zelenskit, duke e cilësuar këtë të fundit si pengesë për arritjen e paqes, e cila do të sillte fundin e luftës 3-vjeçare mes Rusisë dhe Ukrainës.