Një gol i Ferran Torresit, pas një pasimi fenomenal nga Jamali, mjaftoi për Barcelonën në gjysmëfinalen e dytë ndaj Atletikos së Madridit për të prekur finalen e 26 prillit ndaj Realit të Madridit.
Trajneri Hansi Flik pati fjalë të mira pasi djemtë e tij siguruan finalen e Kupës së Mbretit, duke thënë se ata e meritonin dhe se “klasikja” e finales do të jetë një ndeshje e madhe.
“Të vish dhe të fitosh në Madrid kundër Atletikos është shumë e vështirë. Por në fund, mendoj se e kemi merituar për çfarë kemi bërë në fushë. Në pjesën e parë kemi dominuar dhe mund ta kishim mbyllur takimin. Nuk ia dolëm, ndaj na u desh të vuanim disi në të dytën. E prisnim që Atletiko të shtynte përpara. Megjithatë, e kemi administruar mirë. E dëshironim me çdo kusht finalen dhe dua të përgëzoj lojtarët për punën e bërë. Jam shumë i kënaqur. Kundër Realit do të jetë një ndeshje e madhe,” – u shpreh Hansi Flik.
Sezoni i parë po shkon më së miri për trajnerin gjerman në vitin e tij të parë në drejtim. Krahas finales në Kupë, skuadra e tij kryeson kampionatin spanjoll, ndërsa është në çerekfinale të Ligës së Kampionëve, ku do të përballet me Borusian e Dortmundit.