Arben Goxha ishte shpallur në kërkim pasi importoi nga Brazili sasinë e kontaminuar të mishit të pulës me salmonelë, e cila u hodh në treg për shitje.
Policia e Tiranës njoftoi së fundmi se e ka ndaluar 50-vjeçarin, ndërsa pas konsultimit me prokurorinë u vendos që ai të hetohet në gjendje të lirë.
Njoftimi:
Drejtoria Vendore e Policisë Tiranë
Specialistët e Seksionit për Hetimin e Krimit Ekonomik dhe Financiar ndaluan shtetasin A.G., 50 vjeç, të shpallur në kërkim për veprën penale “Importimi, prodhimi, shitja dhe ruajtja e ushqimeve të pasigurta për jetën e njerëzve”. Pas konsultimit me prokurorin, u vendos që ai të procedohet në gjendje të lirë. Materialet procedurale iu referuan Prokurorisë së Tiranës për veprime të mëtejshme.
Skandali me mishin e pulës me salmonelë
Një tjetër skandal ka ndodhur në lidhje me mishin e importuar nga Brazili. Më 11 mars, në portin e Durrësit janë futur 27,000 kg mish pule i importuar nga Brazili. Ky mish dyshohet se është hedhur në treg pa pritur përgjigjen e analizave. Ndërkohë, kur kanë dalë analizat, është konstatuar se i gjithë mishi i importuar ishte i infektuar me bakterin e salmonelës.
Nga analizat e kryera në ISUV, rezultoi se një sasi prej 27 tonësh mish pule ishte e kontaminuar me salmonelë. Pas denoncimit të skandalit në media, reagoi edhe Autoriteti Kombëtar i Ushqimit (AKU). AKU tha se ka referuar rastin në Prokurorinë e Tiranës për veprime të mëtejshme procedurale, për sa i përket elementeve të veprës penale që lidhen me mosrespektimin e kritereve të sigurisë ushqimore.
Në qendër të kësaj historie qëndron kompania “Dimal Inc.”. Sipas të dhënave të mjekësisë, kompania nuk mori asnjë masë për të pezulluar analizën e produktit deri në konfirmimin zyrtar të rezultateve. Mishi erdhi i kontaminuar, u gjet me probleme dhe u shit në çdo rrjet ku kompania kishte shpërndarje.
Salmonela është një bakter që shkakton helmim të rëndë ushqimor, veçanërisht te fëmijët, të moshuarit dhe personat me imunitet të dobët.