Policia e Kosovës ka ndërmarrë një aksion të befasishëm në Ministrinë e Bujqësisë, konkretisht në Agjencinë për Zhvillimin e Bujqësisë (AZHB), që funksionon në kuadër të kësaj ministrie.
Sipas burimeve zyrtare, bastisja po zhvillohet me autorizim të Prokurorisë Speciale të Republikës së Kosovës. Detaje të mëtejshme rreth natyrës së hetimit ende nuk janë bërë publike, por pritet që organet kompetente të japin më shumë informacion në orët në vijim.
Ky aksion policor vjen vetëm një ditë pasi Partia Demokratike e Kosovës (PDK) akuzoi ministrin në detyrë të Bujqësisë, Faton Peci, për shkelje të Ligjit për Pronën Publike. Sipas opozitës, shkeljet lidhen me dhënien me qira të një prone shtetërore për ndërtimin e një impianti për përpunimin e mbetjeve shtazore.
Akoma nuk është e qartë nëse bastisja lidhet drejtpërdrejt me këto akuza politike, por zhvillimet e fundit kanë ngritur shqetësime për menaxhimin e aseteve publike dhe për transparencën në vendimmarrje brenda ministrive qeveritare.
Organi i akuzës dhe Policia e Kosovës ende nuk kanë dhënë një deklaratë zyrtare në lidhje me qëllimin dhe rezultatet e aksionit në fjalë.