Vetëm pak muaj pas fillimit të mandatit të tij të dytë si president i SHBA-së, Donald Trump përballet me një ekonomi që po jep shenja të qarta ngadalësimi. Edhe pse në fillim të vitit 2025 treguesit ekonomikë ishin të fortë – papunësi e ulët, rritje solide ekonomike dhe inflacion i qëndrueshëm – situata ka ndryshuar ndjeshëm në muajt e fundit.
Tregu i punës, që historikisht ka qenë një ndër treguesit më të rëndësishëm të gjendjes së ekonomisë amerikane, ka dhënë sinjale shqetësuese. Shifrat e fundit të publikuara në korrik tregojnë një rritje të papriturisht të ulët të vendeve të reja të punës jashtë sektorit të bujqësisë – vetëm 73,000 vende pune të reja, krahasuar me pritshmërinë prej 110,000. Edhe më shqetësuese janë të dhënat e rishikuara për muajt paraprak: në qershor u krijuan vetëm 14,000 vende pune, shumë më pak se parashikimi fillestar prej 147,000.
Sipas ekspertes financiare Helen Given nga kompania Monex, “shifrat janë më të këqija se çdo parashikim”, duke shtuar se zhgënjimi lidhet kryesisht me tendencën e rënies muaj pas muaji dhe rishikimet negative të vazhdueshme.
Presidenti Trump reagoi menjëherë ndaj të dhënave duke njoftuar shkarkimin e drejtoreshës së Zyrës së Statistikave të Punës, Erika McEntarfer, të cilën e akuzoi për manipulim të të dhënave. Megjithatë, pretendimet e tij nuk u mbështetën me prova, duke ngritur shqetësime të reja për ndërhyrje politike në institucionet statistikore të pavarura.
Një tjetër tregues i brishtësisë së situatës ekonomike është zhvlerësimi i dollarit amerikan. Ekspertët e shohin këtë si një “votë mosbesimi” ndaj politikave ekonomike dhe tregtare të Trumpit. Monedha amerikane ka humbur ndjeshëm vlerën që nga fillimi i vitit, një zhvillim që nga njëra anë ndihmon eksportet amerikane duke i bërë ato më konkurruese, por nga ana tjetër rrit koston e importeve dhe ushtron presion mbi inflacionin.
Dobësia e dollarit është një pasojë e drejtpërdrejtë e frikës së investitorëve për politikat e çrregullta të tarifave doganore që po ndjek administrata aktuale. Këto politika kanë sjellë pasiguri në tregje, duke nxitur shumë investitorë të tërheqin kapitalin nga SHBA.
Ndikimi i kësaj pasigurie është reflektuar edhe në politikën monetare të Bankës Qendrore Amerikane (Fed). Edhe pse shumë ekonomistë kanë pritur një ulje të normës bazë të interesit, Fed ka vendosur ta mbajë atë në nivelin relativisht të lartë prej 4.25 deri në 4.50 përqind. Kreu i Fed, Jerome Powell, ka theksuar se vendimi lidhet me mungesën e qartësisë për pasojat e politikës tregtare të administratës Trump dhe ndikimin e saj në ekonominë amerikane.