Polonia njoftoi se ka ngritur në ajër avionët e saj luftarakë dhe ka neutralizuar disa dronë rusë që hynë në hapësirën ajrore të vendit në orët e para të së mërkurës.
Sipas ushtrisë polake, shkeljet ajrore ndodhën në mënyrë të përsëritur, në një kohë kur Rusia kishte nisur një valë të re sulmesh kundër Ukrainës, përfshirë zona pranë kufirit polak.
Kryeministri Donald Tusk ka informuar sekretarin e përgjithshëm të NATO-s, Mark Rutte, mbi incidentin dhe masat e marra nga Varshava. Si pjesë e reagimit, Polonia ka mbyllur përkohësisht katër aeroporte, mes tyre edhe aeroportin kryesor të kryeqytetit në Varshavë.
Në këtë sfond tensioni, Këshilli i Atlantikut të Veriut do të zhvillojë sot një mbledhje të rregullt, ku një nga pikat kryesore të diskutimit do të jetë reagimi i aleancës ndaj dronëve rusë që shkelën territorin polak.