Qeveria shqiptare ka nënshkruar një marrëveshje me kompaninë izraelite të mbrojtjes Elbit Systems për furnizim me sisteme artilerie, mortaja dhe dronë taktike, raporton gazeta izraelite Haaretz. Marrëveshja është pjesë e bashkëpunimit më të ngushtë ushtarak midis Tiranës dhe Tel Avivit.
Në kontratë përfshihen topa ATMOS 155 mm të montuar mbi kamion, mortaja SPEAR 120 mm dhe dronë nga seritë Magni‑X dhe Thor. ATMOS është një howitzer 155 mm mbi kamion me lëvizshmëri dhe kapacitet të lartë zjarri, ndërsa dronët përdoren për patrullim dhe vëzhgim. Vlera e marrëveshjes nuk është bërë publike.
Sipas raportimeve, fillimisht pritet të furnizohen rreth dhjetë dronë, ndërsa më vonë do të ndihmohet edhe për ngritjen e linjave prodhuese dhe montimi në vend, në bashkëpunim me kompaninë shtetërore shqiptare të industrisë së mbrojtjes. Po ashtu, raportohet se një agjenci izraelite mund të mbulojë rreziqet financiare të marrëveshjes.
Ekspertët thonë se një sistem ATMOS mund të kushtojë disa milionë dollarë, varësisht konfigurimit dhe shërbimeve, por deri tani qeveria dhe Elbit nuk kanë dhënë shifra zyrtare.
Që nga nënshkrimi i memorandumit për bashkëpunim ushtarak verën e kaluar, marrëdhëniet midis Shqipërisë dhe Izraelit janë intensifikuar. Ky kontrakt pritet të jetë një hap tjetër në këtë drejtim. Autoritetet shqiptare ende nuk kanë komentuar përmbajtjen dhe kushtet e marrëveshjes.