Shorti për fazën e playoff-it do të hidhet më 20 nëntor në Zurich, ku do të përcaktohet kundërshtari i gjysmëfinales. Në playoff marrin pjesë 12 skuadra që përfundojnë në vendin e dytë në grupet kualifikuese dhe katër skuadra më të mira nga Liga e Kombeve që nuk kanë siguruar kualifikimin direkt. Përmes playoff-it, katër përfaqësuese do të fitojnë biletën për në Botëror.
12 skuadrat e vendit të dytë do të ndahen në tri vazo bazuar në ranglistën e FIFA-s, ku Kosova ndodhet në vazon e tretë. Katër skuadrat nga Liga e Kombeve do të jenë në vazon e katërt. Në gjysmëfinale, përfaqësueset e vazos së parë do të ndeshen me ato të vazos së katërt, ndërsa ato të vazos së dytë me vazos së tretë.
Edhe Shqipëria është ndër skuadrat shqiptare që e siguroi vendin në playoff. Kombëtarja kuqezi përfundoi e dyta në Grupin K të kualifikimeve, pas një fitoreje vendimtare ndaj Andorrës 1:0 dhe një paraqitjeje të fortë përgjatë gjithë ciklit kualifikues. Goli vendimtar u shënua nga Kristjan Asllani, ndërsa skuadra tregoi një nivel të lartë të organizimit dhe përqendrimit. Shqipëria do të ketë mundësinë të përballet me një nga kundërshtarët e përcaktuar në short, duke kërkuar biletën historike për Botërorin 2026.
Ndeshjet gjysmëfinale të playoff-it janë caktuar më 26 mars 2026, ndërsa finalet do të zhvillohen më 31 mars. Vendasit e katër finaleve do të përcaktohen përmes shortit.
Kjo arritje historike për Kosovën dhe Shqipërinë është një moment i rëndësishëm për futbollin shqiptar pasi i vendos të dyja përfaqësueset në rrugën drejt një debutimi të mundshëm në Kampionatin Botëror 2026, që do të mbahet në Kanada, Meksikë dhe SHBA.