Polonia ka rritur nivelin e gatishmërisë ushtarake pas sulmeve intensive ruse me raketa dhe dronë në pjesën perëndimore të Ukrainës, shumë afër kufirit polak. Komanda e operacioneve të ushtrisë konfirmoi se në orët e para të mëngjesit janë ngritur në ajër avionë luftarakë polakë, mjete të aleatëve të NATO-s dhe avionë paralajmërues të tipit AWACS.
Forcat ajrore polake raportuan se çiftet e avionëve të reagimit të shpejtë, së bashku me sistemet tokësore të mbrojtjes ajrore, u vendosën në gatishmëri të plotë për shkak të kërcënimit të shtuar nga raketat dhe dronët rusë që po godasin vazhdimisht Ukrainën. Në të njëjtën kohë, pothuajse i gjithë territori ukrainas u vendos në alarm të përgjithshëm rreth orës 06:00.
Varshava njoftoi gjithashtu rritjen e nivelit të kërcënimit në disa segmente hekurudhore dhe aktivizimin e ushtrisë për mbrojtjen e infrastrukturës kritike, pas një sërë incidentesh që autoritetet i konsiderojnë si sabotime me origjinë ruse. Një prej tyre ishte shpërthimi në linjën hekurudhore Varshavë–Lublin, që lidh kryeqytetin me kufirin ukrainas.
Klima e tensionuar në Poloni është reflektuar edhe në deklaratat e zyrtarëve të lartë të vendit. Shefi i Shtabit të Përgjithshëm, gjenerali Wisław Kukula, paralajmëroi se Rusia po përgatitet për një konflikt më të gjerë, duke shtuar se vendi ndodhet “në një fazë para-luftës”. Kryeministri Donald Tusk bëri të ditur se qeveria ka aktivizuar nivelin e tretë të alarmit “Charlie”, duke theksuar se dy të dyshuar për sabotimin e fundit në hekurudhë, shtetas ukrainas të lidhur me inteligjencën ruse, janë larguar drejt Bjellorusisë.
Kremlini reagoi menjëherë, duke akuzuar Poloninë se po ushqen “rusofobi”, ndërsa zëdhënësi Dmitry Peskov deklaroi se zyrtarët polakë “po fajësojnë Rusinë për gjithçka”.
Ndërkohë, situata në Ukrainë mbetet dramatike. Në Kharkiv, një sulm i rëndë me dronë plagosi të paktën 32 persona, ndërsa një ndërtesë nëntëkatëshe u përfshi nga flakët. Në dy ditët e fundit, sulmet ruse me raketa kanë shkaktuar të paktën katër viktima, përfshirë një vajzë 17-vjeçare. Me afrimin e dimrit dhe rënien e temperaturave, Moska ka shtuar sulmet ndaj infrastrukturës energjetike, ndërsa Kievi vijon të shënjestrojë objektet e karburantit dhe rafineritë brenda territorit rus.
Tensionet në kufirin lindor të NATO-s mbeten në nivelet më të larta të viteve të fundit, ndërsa Polonia dhe aleatët e saj po përgatiten për çdo skenar.