Ilir Alimehmeti u pyet nëse do të garonte përballë Sali Berishës për drejtimin e Partisë Demokratike. Ai nuk dha një përgjigje të drejtpërdrejtë, por theksoi se partia ka potencial për të korrur suksese të mëdha, duke theksuar nevojën për një riorganizim të strukturave dhe të rolit të secilit në “fushën politike”.
Alimehmeti përdori një metaforë sportive për të shpjeguar rëndësinë e vendosjes së njerëzve në pozicionet e duhura: “Nuk mund të marrësh mesfushorin ta fusësh në portë, portierin ta çosh në sulm dhe të pretendojmë që skuadra të luftojë. Me një riorganizim të lojtarëve në fushën politike, PD ka mundësi të korrë suksese të mëdha.”
Ai shtoi se strukturat e partisë duhet të mblidhen dhe të diskutojnë çdo rol dhe çdo individ në vendin e duhur, duke mos mohuar vlerat e tyre. Alimehmeti e lidhi këtë me nevojën për hapjen e garave në PD, duke paralajmëruar se pa diskutime dhe organizim, partia rrezikon të bëhet një “parti memece”.
Në fund, ai nënvizoi rëndësinë e strukturave dhe proceseve demokratike brenda PD-së, duke mos konfirmuar ende nëse do të jetë vetë pjesë e garës për drejtimin e partisë në pranverën e ardhshme.