Në Venezuelë janë zhvilluar protesta masive kundër politikave të SHBA-së, ndërsa presidenti Nicolas Maduro mobilizoi mijëra mbështetës në një tubim në Karakas. Ai deklaroi se vendi nuk pranon “paqen e skllevërve” dhe se prania e aseteve ushtarake amerikane gjatë 22 javëve të fundit e ka vendosur Venezuelën në një “sprovë të vërtetë”.
Protestuesit, të mbledhur në qendër të kryeqytetit, denoncuan presionin e Uashingtonit pak para mbledhjes së Këshillit të Sigurisë Kombëtare të SHBA-së të thirrur nga presidenti Donald Trump, që kishte në fokus situatën në Venezuelë.
Maduro theksoi se vendi kërkon “paqe me sovranitet, barazi dhe liri”, duke refuzuar çdo formë nënshtrimi. Ai akuzoi SHBA-në se, nën pretekstin e luftës kundër trafikut të drogës, ka vendosur një prani të madhe ushtarake në Karaibe, ku përfshihet edhe aeroplanmbajtësja USS Gerald R. Ford.
Presidenti amerikan Trump konfirmoi se ka zhvilluar një bisedë telefonike me Maduron javën e kaluar, ndërsa lideri venezuelian pretendon se qëllimi i SHBA-së është “ndryshimi i regjimit” dhe vënia nën kontroll e rezervave të mëdha të naftës.
Që nga shtatori, ushtria amerikane ka kryer sulme ajrore në Karaibe dhe në Paqësor kundër anijeve të dyshuara për trafik droge, operacione që sipas OKB-së kanë shkaktuar mbi 80 viktima dhe përbëjnë “vrasje jashtëgjyqësore”. Situata u tensionua më tej kur Trump shpalli hapësirën ajrore venezueliane të “mbyllur”, duke detyruar disa linja ajrore të anulojnë fluturimet; Maduro u përgjigj duke u hequr licencat për operim në vend.
Në demonstratë, zëvendëspresidentja Delcy Rodriguez deklaroi se Venezuela po lufton “për mbrojtjen e sovranitetit dhe burimeve të saj kombëtare”. Ndërkohë, kryetari i Dhomës, Jorge Rodriguez, tha se pavarësisht presioneve dhe “strategjive të luftës psikologjike”, populli venezuelian do të vazhdojë të protestojë për mbrojtjen e atdheut.