Kompania teknologjike “Meta” ka filluar mbylljen e llogarive në Facebook, Instagram dhe Threads për përdoruesit nën 16 vjeç në Australi, vetëm një javë para hyrjes në fuqi të ndalimit zyrtar për adoleshentët në rrjetet sociale.
Meta njoftoi muajin e kaluar se kishte paralajmëruar përdoruesit e moshës 13–15 vjeç se nga data 4 dhjetor llogaritë e tyre do të çaktivizoheshin. Sipas vlerësimeve, rreth 150,000 llogari në Facebook dhe 350,000 në Instagram pritet të preken nga kjo masë. Ligji i ri, i pari në botë, bëhet aktiv më 10 dhjetor.
Sipas rregullores, kompanitë që nuk marrin masa për të ndaluar hapjen ose mbajtjen e llogarive nga fëmijët nën 16 vjeç, rrezikojnë gjoba deri në 49.5 milionë dollarë australianë. Një zëdhënës i Metës tha për BBC se zbatimi do të jetë “një proces i vazhdueshëm dhe shumështresor”, duke theksuar se kërkohet një qasje më e standardizuar për verifikimin e moshës.
Meta kërkon që ofruesit e aplikacioneve të marrin rol kryesor duke verifikuar moshën e përdoruesve para shkarkimit dhe duke kërkuar miratim prindëror për personat nën 16 vjeç, për të shmangur verifikimet e përsëritura brenda aplikacioneve.
Muajin e kaluar, Meta deklaroi se përdoruesit e identifikuar si nën 16 vjeç do të kenë mundësi të shkarkojnë dhe ruajnë postimet, videot dhe mesazhet e tyre para çaktivizimit të llogarisë. Ata që mendojnë se janë kategorizuar gabimisht mund të kërkojnë rishikim përmes një “selfie video” ose duke paraqitur dokument identifikimi si patentë shoferi apo ID zyrtare.
Ndalimi përfshin edhe platformat YouTube, X, TikTok, Snapchat, Reddit, Kick dhe Twitch. Qeveria australiane siguron se masa synon të mbrojë të miturit nga rreziqet e mediave sociale, ndërsa kritikët paralajmërojnë se mund t’i shtyjë të rinjtë drejt platformave më pak të rregulluara.
Ministrja e Komunikacionit, Anika Wells, pranoi se ditët e para mund të shoqërohen me sfida, por theksoi se vendimi është kyç për mbrojtjen e Gjeneratës Alfa nga “algoritmet grabitqare”. Ajo shtoi se po monitoron edhe aplikacionet më pak të njohura si Lemon8 dhe Yope, për të parë nëse të rinjtë po kalojnë në ato platforma pas ndalimit.
Ndërkohë, Komisionerja e Sigurisë Elektronike, Julie Inman Grant, ka kërkuar nga këto aplikacione që të vetëvlerësojnë nëse preken nga ligji. Bashkëthemeluesi i Yope, Bahram Ismailau, deklaroi se platforma ka kryer vetëvlerësimin dhe se nuk konsiderohet rrjet social sipas kritereve të ligjit të ri.